سلام پرېس 
د ایران د روغتیا وزارت ویلي، چې ایراني ډاکټران، د متخصصینو او نرسانو په ګډون ۴۰ افغان روغتیایي کارمندانو ته د ځانګړې روغتیايي پاملرنې ( ای سي یو ) په برخه کې یوه میاشتنۍ روزنه ورکوي. تهران ټایمز په خپاره کړي، راپور کې ویلي، چې دغه روغتیايي کارکوونکي په ایران کې خپلو زده کړو ته دوام ورکوي او د سرپرست حکومت د روغتیا وزارت ویلي، چې افغانستان ته د دوی له راستنېدو سره به خپلې زده کړې د افغانستان روغتیايي سیسټم ته انتقال کړي. د یاد وزارت چارواکي دغه راز وایي، چې دوی په کور دننه او بهر د روغتیايي کارکوونکو روزنې ته ژمن دي. د چارواکو په خبره د دې نوښت موخه دا ده، چې د روغتیايي پاملرنې یو پیاوړی سیستم رامنځته شي او په ټول هېواد کې ناروغانو ته په لوړ کیفیت روغتیایي خدمتونه وړاندې کړي.
