سلام پرېس 
د فراه ولایت د پوهنې رياست مسوولینو خبر ورکړی، چې په دغه ولایت کې د ۳۱ میلیونه ۱۸۹ زره افغانيو په لګښت د ۳۹ ښوونځيو ودانۍ بيارغول شوې دي. د مالوماتو له مخې دغه د ښوونځيو یادې ودانۍ د پوهنې رياست د داخلي بودجې د ۸ ميليونه ۹۳۲ زره افغانيو په لګښت د ۱۷ ښوونځيو د بیا رغولو ترڅنګ، د يو ميليون ۴۶۶ زره افغانيو په لګښت د ياد رياست ودانۍ او د ساتونکو ځانګړې خونه او د ناستو تالار هم رغول شوی دی. د یاد ولایت د پوهنې رياست مسوولین وایي، چې د تېر کال په بهير کې د فراه ښار په ګډون په يو شمير ولسواليو کې يونيسف د ۲۰ ميليونه افغانيو په لګښت, د اتو ابرار مؤسسې د ۲۰ زره ډالرو په لګښت, د اتو او ودان مؤسسې د ۶۱۳ زره افغانيو په لګښت د شپږو ښوونځيو ودانۍ بيا رغول شوي او دغه راز د يونسيار مؤسسې په مالي ملاتړ د۳۵۰ زره ډالرو په لګښت د يوه ښوونځي دوه پوړيزه ودانۍ هم تر کار لاندې ده او په نږدې راتلونکي کې به ګټې اخيستنې ته وسپارل شي.
